ROXAS CITY – Padayon nga ginabulong sa ospital ang 37-anyos nga lalaki matapos ginlabo sang kaupod sa ilimnan sa Barangay Igang, Jamindan, Capiz.
Nag-angkon sang pilas sa magkatuhay nga bahin sang lawas ang biktima nga si Joebert Benedicto.
Nagaguwa sa imbestigasyon sang Jamindan PNP nga magkaupod nga nagainum ang biktima kag ang suspek nga si Ernesto Benedicto 47-anyos sang Barangay Maantol, Jamindan sang nakaangkon sang indi pag-intiendihanay ang biktima kag ang iya amay.
Nagtambag ang suspek agud indi na magdaku ang kinagamo.
Apang ginaalegar nga ginkaakig sang biktima ang kasubong pagpasilabot ni Ernesto, rason nga sila naman nga duha ang nagsabtanay.
Bangud sa kaakig sang suspek, hinali sini ginlabo sang binangon ang biktima nga nag-angkon sang pilas sa magkatuhay nga bahin sang lawas.
Gilayon nga gindala sa ospital ang biktima agud madapatan sang pagbulong ang iya samad samtang nagsungka si Ernesto sa barangay kagawad sang Barangay Maantol, Jamindan nga amo naman ang nagturnover sa iya sa mga kapulisan.
