ROXAS CITY – Pilason ang isa ka lalaki matapos natiruhan sang ginaalegar riding in tandem sa Barangay Sta. Cruz, Dumalag, Capiz.
Ginkilala ang biktima nga si alyas Jonel, 48-anyos kag residente sang nasambit nga lugar. Samtang wala pa matumod sang kapulisan ang ginapahayag duha ka suspek nga nagasakay sa motorsiklo.
Suno kay PMAJ. Cheryl Visto, Hepe sang Dumalag Municipal Police Station, ginapahayag nga samtang nagalakat sa higad sang karsada ang biktima sang hinali ini nga ginpunduhan sang duha ka wala ma-identify nga persona kag ginluthang.
Bangud sini, nag-angkon sang pilas ang biktima sa iya tuo nga paa nga gilayon naman nga ginpadangat sa Dao District Hospital para sa nagakaigo nga pagbulong.
Samtang, madasig naman nagpalagyo ang mga suspek padulong sa wala matumod nga direksyon.
Ginapahayag nga nagasuksok sang bonet, naka-jacket nga duag itom kag maong nga pantalon ang mga suspek nga nagasakay sa nagaduag asul kag itom nga motorsiklo.
Sa karon, nagapadayon pa ang imbestigasyon sang Dumalag PNP angut sa nasambit nga insidente.
