Sa sobra ka desperado nga matuman ang iya handom nga mangin isa ka doktor, ang isa ka 20-anyos nga lalaki sa Uttar Pradesh, India, ginasuspetsahan nga hungod nga gin-utod sang iya kaugalingon nga batiis agud makasulod sa medical schoolsa idalom sang disability quota.
Ang lalaki amo si Suraj Bhaskar, makaduha na ka beses nga napaslawan siya sa The National Eligibility cum Entrance Test exam, ang entrance examination para sa mga medical school sa India.
Bangod sini, nahunahuna ni Suraj nga himuon ang nagaluntad nga Persons with Disabilities (PWD) quota, isa ka layi nga naga-alokar sang 5 percent sang kabug-usan nga slot sa mga pampubliko nga unibersidad kag mga medical school para sa mga aplikante nga may kasablagan, ukon ang katumbas sang lima sa kada 100 admission slots.
Sa idalom sang layi sa India, ang mga aplikante nga may kasablagan mahimo mag-apply sa idalom sang amo nga quota, basta makapasar gihapon sila sa minimum requirements kag mapamatud-an nga makahimo sila sang Physical and Clinical Duties sang pagka-doktor.
Suno sa pamilya ni Suraj, gin-atake siya sang wala mahibaluan nga persona. Apang, nagduda ang kapulisan matapos matalupangdan nga matinlo kag eksakto ang pilas sa iya paa nga daw kaangay nga gingamit sang surgical instrument kag indi sang kutsilyo ukon kinaandan nga armas.
Dugang pa, natukiban sang mga awtoridad ang diary ni Suraj, nga maathag nga nagapahayag sang iya determinasyon nga magtuon sang medisina sa 2026 sa bisan ano nga pamaagi.
Ginbuyagyag man sang iya nobya sa mga pulis nga madugay na nga obsess si Suraj nga makasulod sa eskwelahan sa medisina.
Bangud sa mabaskog nga pagduda nga hungod kag plano ang pag-utod sang iya batiis, posible nga indi na siya paghatagan sang opisyal nga disability certificate, isa ka importante nga kinahanglanon agud makasulod sa quota sang PWD.
Sa baylo nga admission letter, si Suraj posible nga mag-atubang sa kaso nga kriminal, diskwalipikasyon, kag ang permanente nga pagkaguba sang iya karera sa medisina kon mapamatud-an nga ginplano niya ini tanan sang hungod.
Sa subong, nagapaayo na si Suraj sa isa ka trauma center samtang nagapadayon ang imbestigasyon sang kapulisan.
