JAPAN – Kilalahon ta si Happy, ang lalaki nga indi happy sa iya pangalan.
Ari ang iya istorya.
Sang ginbun-ag ini nga lalaki sa Japan, ginhatagan siya sang iya iloy sang pangalan nga Happy bangud sa kalipay nga dulot sang pag-abot niya sa ila pamilya.
Apang sang nagdako ini, madamo na ang nagasunlog sa iya nga mga bata kag ginakadlawan siya.
Ang pag-bully sa iya nagpadayon bisan nga yara na siya sa high school kag kolehiyo.
Bisan sa iya lovelife, malas man ang dala sang iya pangalan.
Mangin sa iya pagpangita sang trabaho, wala man siya ginaseryoso sang kompaniya kun sa diin siya naga-apply sang trabaho bangud sa iya pangalan.
Maswerte na lang nga may isa ka kompaniya nga nag-hire sa iya bangud ginkabig ang iya pangalan nga good omen kag nakapangita siya sang trabaho.
Sa pihak sini, tubtob subong, indi gihapon matago ni Happy nga unhappy siya sa iya pangalan.
Sa pagkamatuod, gintuyo pa niya sadto nga paislan na lang ang iya pangalan apang indi man niya luyag nga maglain ang buot sang iya iloy.
Matapos nga naglapta sa Japan ang iya istorya, madamo naman ang nagpabutyag sang suporta kag gin-engganyo siya nga mangin positibo gihapon sa kabuhi kag ikabuhi ang iya pangalan nga HAPPY.
via Bombo Radyo Iloilo
