Isa ka Canadian environmentalist nga gintawag nga “Plastic King” ginkilala sang Guinness World Records pagkatapos nga nagtukod siya sang apat ka panalgan nga kastilyo gamit ang linibo ka plastic bottles.
Si Robert Bezeau nagtukod sang “Castillo Inspiración” sa Bocas del Toro, Panama. Ang estraktura may kataason nga 46 ka tapak kag gintukod gamit ang 40,000 ka plastic bottles. Ini ang naghatag sa iya sang titulo: nga “Largest Castle Made from Plastic Bottles”.
Nag-umpisa ang adbokasiya ni Bezeau sang 2012 sang nadiskubrehan niya ang chronic waste problem sa isla, sa diin ginabulubanta nga masobra isa ka milyon ka plastic bottles ang nagalapta sa palibot.
Sa baylo nga mag-recycle, ginpasanyog niya ang “upcycling” ukon ang paggamit sang basura bilang materyal sa konstruksyon kag insulasyon para sa mga building.
Ang kastilyo kabahin sang mas daku nga “Plastic Bottle Village” nga iya gintukod.
May yara man ini sang “dungeon” nga human sa 10,000 ka botelya sa diin ang mga bisita mahimo magtulog sa mga selda agud “maghinulsol” sa ila pagpatumbaya sa palibot kag magbag-o sang ila batasan sa pagkonsumo padulong sa single-use plastics.
