ROXAS CITY – Mas ginpasangkad pa sang Local Government Unit –LGU Pilar ang border control agud matapna ang African Swine Fever (ASF).
Ini ang matapos nagpositibo sa balatian ang isa ka backyard farm sa Barangay San Antonio, banwa sang Pilar.
Sa interview sang Bombo Radyo kay Pilar Mayor Arnold Perez, ginsiling sini nga humalin Nobyembre nagpatigayon na sang border checkpoint apang may yara sa gihapon nga nakalusot rason nga naapektuhan na ang isa nila ka Barangay.
Bangud sini, ginmanduan ni Perez ang natungdan nga mas pasangkaron pa ang checkpoint ilabi na ang pagsulod sang mga buhi ukon karne sang baboy nga magagikan sa Balasan, Iloilo kag magtuyo magsulod sa probinsya.
Ginklaro man sini, nga ang nadadakpan sa checkpoint ang wala ginatugutan sulod sa lugar ukon ginasunog kag gilayon nga ilubong.
Panawagan sini sa mga pumuluyo, nga pananglitan magpangluya ang ginahuptan nga baboy gilayon nga magreport sa Municipal Agricultures Office agud matsekyar kag matest kun positibo ini sa ASF.
