ROXAS CITY – Ginpakigbahin ni Ivisan Mayor Felipe Neri Yap ang rason sa paghinyo sini sa Regional Inter-Agency Task Force (RIATF) sang ‘Time-out’ sa pagpapuli sa mga Locally Stranded Individuals ukon LSI’s sa ila banwa.
Sa interview sang Bombo Radyo kay Yap ginpahayag sini nga ginhimo niya ini nga desisyon matapos nga nag-angkon sang “Flu like Symptoms” ang ila nga MedTech ukon Medical Technologist nga amo nagaisahanon nila nga naga-swab sa mga LSI’s kag ROF’s.
Bangud diri ginpaidalom ini sa isolation kag ang mga medical frontlines kag responders nga naka-close contact sini.
Suno kay Yap nga nagpadala ini sang request sa RIATF apang tubtob subong nagapabilin nga pending kag nagahulat lamang ang lokal nga gobyerno sang Ivisan.
Mahibaluan nga nasaad sa request sang amo nga alkalde nga sumugod sa Disyembre 1 tubtob 15 ang ginhinyo nga petsa sa pagpaunta sa mga magapauli nga mga LSI’s.
