Padayon nga ginaimbestigaran sang local government unit sang President Roxas Capiz ang pagpangawat sang wiring sang mga streetlights sa national highway sang banwa.
Sa interview sang Bombo Radyo kay President Roxas Capiz Mayor Receliste Esculin, iya ginpahayag nga natingala sila matapos nga wala nagasiga ang pila ka poste sang streetlights sa mga dalanon sang banwa.
Suno kay Esculin, sang iya ginpadulungan ang nasambit nga mga poste natukiban sini nga ginkawat ang mga wiring sa mga poste sang national highway.
Bangud sini nagkoordinar ang alkalde sa kapulisan agud mapanabat ang responsable sa pagpangawat.
Ginapangabay man sang alkalde sa kapulisan nga kun mahimu nga mapanabat ang mga junk shop nga nagabakal sang mga wiring nga posible halin sa kinawatan.
