ROXAS CITY – Nagapadayon ang pagpanghatag sang relief goods sang Local Government Unit (LGU) sang Sigma, matapos nga gindeklarar sa state of calamity ang ila banwa sag damlag lang.
Ini bangud sa asud-asod nga pagbinaha-baha sa pila nila ka mga kabarangayan nga tuga sang Low Pressure Area kag ginsundan sang Bagyo nga Odette.
Sa interview sang Bombo Radyo kay Jonard Compuesto, pinuno sang Municipal Disaster Risk Reduction and Management Office, suno diri nga kapin 9,600 ka mga pamilya ang apektado sa ila nga banwa, kun sa diin 13 na ka mga kabarangayan ang ila nahatagan sang amu nga food packs.
Kalakip sa relief goods amu ang 5 kilo sang bugas, 3 ka sardinas kag 3 ka noodles.
Base sa datos nga ginsumiter sang pila ka mga Punong Barangay, may 78 sila sa karon ka mga partially damaged nga mga balay, ini ang ginakabug-osan sang Amaga-47, Balucuan-19, Matinabus-10 kag Cogon-2.
Apat man ka mga barangays ang ginbaha bangud sa kalamidad, ini ang mga Barangay sang Dayhagon, Bangon-bangon, Cogon kag Mangoso.
Paga-istoryahan man suno diri sang ila nga LGU kun may pagabatunon ang tag-iya sang mga partially damaged nga balay, bangud nakadepende pa sa ila mahinyuan nga pondo sa probinsya ukon sa nasyunal, matapos nga nagamit na nila sa karon ang Quick Response Fund (QRF) sang ila munisipyo.
Sa pihak nga bahin, wala pa makasumiter ang ila Municipal Agriculturist sang pinal nga kantidad sa nangin danyos sang Bagyo Odette sa ila banwa.
