Mahimo na mahibaluan subong nga adlaw kun sin-o ang mapilian sang partido Liberal nga magapadalagan sa pagka-gobernador sa probinsiya sang Capiz, kasunod sa pagpadulong sa syudad sang Roxas si anay DILG Secretary Mar Roxas.
Suno kay Capiz 1st Distric Congressman Emmauel ‘’Tawi’’ Billones Sr., katuyuan sang pagpadulong ni Roxas ang pagdeklara sa linyada kag mga kandidato sang Liberal Party para sa nagahilapit nga 2022 national and local elections.
Ginpasiguro man ni Congressman Billones nga plantsado na ang linyada sang ila partido sa probinsiya humalin sa posisyon sa pagka-gobernador tobtob sa kabanwahanan.
Nahibaluan pa nga indi na malawig kag mabudlay ang proseso sa ila pagpili sa mangin official candidate sa pagka-gobernador sang partido Liberal sa diin kilala ini nga personalidad, mabaskog kag sigurado nga magadaug sa eleksyon.
Samtang ginahatagan ligwa sang partido ang kada banwa nga magpili sang adlaw sa ila pagfile sang Certificate of Candidacy (COC).
