ROXAS CITY – Wala sang personal nga eksperyensiya si Capiz 1st District Congressman Emmanuel ‘Tawi’ Billones Sr. inangut sa ginbuyagyag ni anay House Speaker Pantaleon Alvarez nga bayranay sang isa ka milyon ka pesos sa tagsa ka kongresista agud makuha ang boto para sa House Speakership.
Sa interview sang Bombo Radyo Roxas kay Billones, ginpahayag sini nga sa pila ka tuig niya sa House of Representatives, wala pa sang nagpalapit sa iya agud bayaran ini para lamang makuha ang iya nga boto sa isa ka House speakership bid.
Apang posible suno sa iya nga matuod ang nangin rebelasyon ni Alvarez bangud nangin House Speaker naman ini sadto sang Kamara.
Bilang miyembro sang oposisyon, ginpahayag ni Billones nga sa karon wala pa sila sang napili sa Liberal Party nga ila igatib-ong para sa House Speakership.
Apang pila sa matunog nga pangalan sa House Speaker race amo sanday Alvarez, Marinduque Rep. Lord Allan Velasco, Taguig Rep. Alan Peter Cayetano kag Leyte Rep. Martin Romualdez.
