Narekober sang mga otoridad ang lima (5) pa ka mga bangkay gikan sa nalugdang nga MV Trisha Kerstin-3 sa kadagatan malapit sa Baluk-Baluk Island, Basilan.
Suno sa Philippine Coast Guard (PCG), padayon ang ila mga technical divers sa underwater search and recovery operations.
Nasapwan ang mga bangkay sa economy accommodation area sa una nga deck sang barko.
Lakip sa mga na-recover amo ang isa ka lapsag, isa ka bata, duha ka mga babayi, kag isa ka teenager. Wala pa matumod ang gender sang duha ka menor de edad.
Halin sa Zamboanga City, igasaylo ang mga ini sa Talabaan Cemetery sa diin ipaidalom sila sa forensic processing sang mga eksperto.
Ginapanugyanan naman ang mga pamilya sang mga biktima nga may missing pa nga mga himata nga magpadulong sa nasambit nga sementeryo agud magbulig sa pagkilala sang mga bangkay.
Matandaan nga naglugdang ang MV Trisha Kerstin-3 sang kaagahon sang Enero 26 kag nasapwan ang barko sa kadagatan malapit sa Baluk-Baluk Island sang Martes sang nagligad nga semana.
Padayon pa ang search and recovery operations sang mga otoridad para sa posible nabilin nga mga biktima.
