ROXAS CITY – Madinalag-on nga ginpatigayon ang una nga semana sang liwat nga pagbukas sang Congressman Ramon A. Arnaldo High School (CRAAHS) sa Barangay Banica, sini nga syudad para sa limited face to face classes.
Ini ang ginkumpirmar ni Mr. Rodrigo Jeremias, Principal IV sang nasambit nga eskwelahan, sang mainterview sang Bombo Radyo.
Suno diri, may yara sang 116 ka mga estudyante nagikan sa grade 7 tubtob Grade 12 ang nagpartisipar sa amu nga in-person classes, kun sa diin ginhiwat ini pinaagi sa half-day class.
Ginapatuman man ang alternate nga pagtulon-an, kun sa diin, isa ka semana nga maga-report ang mga estudyante sa eskwelahan kag sa masunod nga semana, modular learning naman ang pagabuhaton sang mga estudyante.
Ginpahayag diri nga apisar may face to face classes na, indi sa gihapon madula ang modular kag online learning.
Wala naman sang nareport nga nagmasakit nga estudyante matapos ang liwat nga pagbukas sang eskwelahan.
Samtang, magapatawag man si Jeremias sang pagsinapol kaupod ang mga ginikanan kag pagahinalaan ang pagpatuman sang face to face graduation, agud makahimo sang tikang nga masunod ang igapapanaug nga pagsulondan sang DepEd.
Nahibaluan nga sa syudad sang Roxas, ikatatlo ang CRAAHS nga pampubliko nga eskwelahan nga ginpahanugutan nga maghiwat sang limited face to face classes.
