Ginatos ka libo nga mga tawo ang padayon nga nagadugok sa St. Peter’s Basilica agud maghatag sang pasidungog kay Pope Francis, nga napatay sang Lunes sa edad nga 88. Naglab-ot sa 48,600 ka mga tawo ang naglabay sa iya lungon tubtob Huwebes sang aga, suno sa Vatican.
Bilang sabat sa pagdagsa sang mga tawo, ginpalawig ang oras sang pagbukas sang basilica, nga nagpabilin nga bukas halin sang Miyerkules sang aga tubtob alas 5:30 sang aga sang Huwebes.
Ang lungon ni Pope Francis ginbutang sa atubang sang altar ni San Pedro, sa diin nagasuksok ini sang pula nga chasuble, puti nga mitre, kag may ginauyatan nga rosaryo. Isa-isa lang ang mga tawo nga gintugutan nga mag-agi, ang kalabanan nagakuha sang laragway gamit ang ila cellphone.
Samtang, nag-abot man ang linibo ka mga dumuluong nga deboto nga ginalakipan nanday Federico Rueda sang Argentina kag Leobardo Guevara sang Mexico nga lunsay nagpabutyag sang ila pagdayaw kag pagpasalamat sa nagtaliwan nga Santo Papa.
Si Francis, nga kilala bilang isa ka manugpangapin sang mga ginapigos kag ang una nga papa gikan sa Amerika, napatay pagkatapos nga nag-antos sang sakit nga stroke, halos isa ka bulan pagkatapos nga nakigbato sa double pneumonia.
Ginalauman nga magatambong sa iya lubong ang nagkalain-lain nga national leaders sa Sabado, Abril 26, lakip na si US President Donald Trump, Ukrainian President Volodymyr Zelensky, Britain’s Prince William kag President Ferdinand Marcos Jr.
Kapin sa 170 ka mga dumuluong nga delegasyon ang ginalauman nga magatambong sa Roma, suno sa mga otoridad.
Pagkatapos sang lubong, dal-on ang bangkay ni Pope Francis sa Basilica ni Santa Maria Maggiore, sa diin ini magapabilin
