ROXAS CITY – Magasugod ang pagdumili sang makahulubog nga ilimnon ukon liquor ban sa Mayo 8 tubtob sa adlaw sang eleksyon.
Ini ang ginkumpirmar ni Atty. Rommel Benliro, City Comelec Officer sang mainterview sang Bombo Radyo.
Suno diri, hugot nga ginadumilian sang komisyon ang pagbakal, pagbaligya kag pag-inom sang makahulubog nga ilimnon sa adlaw nga gintalana sang pagpatuman sang liquor banning.
Ginklaro ni Benliro, nga kun ang isa ka persona ang yara sa impluwensya sang makahulubog nga ilimnon kag nagatuga sang kinagamo sa mga gintalana nga polling precints posible ini nga indi makaboto kag pagadakpon.
Ang mapamatud-an nga nagabaligya kag nag-inom ang magapangatubang sa election offense sa idalum sang omnibus election code.Ang nasambit nga banning ang igapatuman kaupod ang mga katapo sang kapulisan agud mapabilin ang katawhay kag kalinong sang palaabuton nga national kag local election.
Samtang, makonsiderar naman nga vote buying ang madakpan nga mga ilimnon nga hatag ukon nagikan sa mga kandidato kag posible nga madiskwalipika.
