Nagpanaog sa pwesto si Lithuania Prime Minister Gintautas Paluckas kasunod sang mga imbestigasyon sa iya business dealings sa diin nagpatigayon sang hublag protesta ang mga tawo sa Baltic kag nagpanawagan nga mag-resign ini.
Si Lithuanian President Gitanas Nausėda ang nag-anunsyo sang resignation ni Paluckas.
Nangin lider si Paluckas sang Social Democratic Party kag pinuno sang gobyerno matapos ang eleksyon sang tinalikdan nga Oktubre. Siya ang nanguna sa coalition sang tatlo ka mga partido.
Apang nabutang sa kontrobersiya si Paluckas bangud nangin involve ini sa daan na nga scandal sang 2012 nga ginatawag “rat poison scandal” sang siya ang city official pa lamang sa Vilnius. Ginaalegar nga naghatag ini sang government contract sa kompaniya nga indi patas sa diin ginhatagan ini sang multa nga wala niya mabayaran.
Ginausisa ini subong sang mga otoridad kag ang iya mga negosyo sa diin gina-kwestyon sang publiko.
Bangud sa sini nga mga issues nga nagguwa, naapektuhan ang iya reputasyon.
Ginpili ni Paluckas nga mag-resign na lang antes pa man siya sipaon sang opposition pinaagi sa impeachment process.
Sa subong, ginalauman nga ang iya nga cabinet members ang magapanaog man sa pwesto.
Ginalantaw sang publiko nga may yara na sang bag-o nga coalition nga maga-istoryahanay agud makaporma sang bag-o nga gobyerno.
