Nangin mainit ang ginpatigayon nga consultative meeting kahapon sang League of Municipalities (LMP) Capiz Chapter kaupod ang pila ka opisyal kag consultant sang Roxas Memorial Provincial Hospital kasunod sang pagbayluhanay sang tinaga sang pila ka mga alkalde kalakip ni Atty. Macky Cosgayon angut sa isyu sang Data Privacy Act.
Ginpamangkot ni Mayor Roberto Palomar sang Tapaz kun ano ang rason nga nadugayan ang pagsumiter sang dokumento nga kaundan sini ang personal data sang mga empleyado sang Roxas Memorial Provincial Hospital sa Sangguniang Panlalawigan bangud kabahin ini sang dokumento nga ginapangita agud ma-aprubahan ang supplemental budget sang amo nga ospital.
Nagpaathag naman si Atty. Macky Cosgayon, consultant sang provincial government nga na-delay sila sa pagsumiter bangud kinahanglan pa nila nga magpangayo sang consent sa natungdan nga mga empleyado.
Depensa pa ni Cosgayon nga indi mahimo mapaguwa ang personal data sang natungdan nga mga empleyado apisar pa nga nagatrabaho sila sa gobyerno sandig man sa nasaad sa data privacy act.
Apang ginkwestyon ni Mayor Leodegario Jun Labao Jr., sang banwa sang Mambusao ang nangin pahayag ni Cosgayon sa diin suno sa alkalde nga kinahanglan mangin transparent lamang ang gobyerno.
Ginpahayag pa ni Labao nga indi dapat magkabalaka ang pamunuan sang RMPH kun wala sila sang may ginatago.
Nagpanugyan man si Mayor Palomar nga dapat makaangkon na sang harmony sa tunga sang executive kag legislative bangud kun magdugay pa ang ila pagbangingay mga pumuluyo ang apektado.
