Nagapanawagan ang Amlig Antique Alliance sang suspension sang pila ka mga government road projects sa Central Panay Mountain Range (CPMR) bangud makaguba ini sa palibot kag mabutang sa risgo ang komunidad.
Naalarma ang lokal nga grupo sa pito ka mga road projects sang Department of Public Works and Highways (DPWH) sa Laua-an, Antique, padulong sa Tapaz, Capiz, kag iban nga ruta nagikan aa Valderrama, Antique, pakadto sa Lambunao, Iloilo.
Indi magnubo sa lima sang sini nga mga proyekto ang gina-uyatan sang Sunwest Inc., ang kontraktor nga naangot sa iregularidad sang national flood-control program.
ROAD PROJECTS NGA GINA-KWESTYON
Ang mga proyekto ang kabahin sang Panay East-West Lateral Road (PEWLR) , isa ka 41-kilometer road network nga nagabalor sang ₱2.6 billion.
Ang mga kontrata sang Sunwest ang ginalakipan sang mga masunod;
* Road construction nagikan sa Laua-an Ridge View pakadto sa Aklan River
* Road works sa Barangay Maybunga–Sitio Sadsadan, Laua-an
* Road and slope protection sa Barangay Pandanan, Laua-an
* Road construction sa Barangay Lupa-an, Laua-an
* Additional road works sa Antique
ENVIRONMENTAL CONCERNS
Ang Central Panay Mountain Range ang nagapabilin nga ecological frontiers sa Pilipinas.
Ini ang nagaserbe bilang watershed para sa Panay Island kag puluy-an sang mga pinasahi nga tanom kag kasapatan.
Nagpaandam ang mga eksperto nga ang pag-utod pinaagi sa mga kagulangan ang mahimo magtuga sang flash floods, landslides, kag pagkadula sang biodiversity.
Ang lugar ang ginkilala sang conservation groups bilang Key Biodiversity Area (KBA) kag Important Bird Area (IBA), kag ginakonsidera man nga i-deklara bilang protected area sa idalom sang layi sa Pilipinas.
Nagaduda man ang mga kritiko sa pagtukod sang makabig mahalalon nga dalan sa remote kag farming areas nga wala man sang traffic.
Pila ka mga grupo ang nagasuspetsa nga posible ang mga proyekto ang para sa paghatag sang access sa mining areas nga may yara sang gold, copper kag iban pa nga minerals.
Ang mga mining firms ang may yara na sang exploration permits sa pila ka mga lugar sa Antique, Capiz kag Iloilo.
MAY MGA BAYOLASYON?
Ginaalegar nga may yara sang nakit-an nga pipila ka mga project billboards nga wala sang Environmental Compliance Certificate (ECC) numbers, nga kinahanglanon antes ang konstraksyon.
Gin-akusaran man sang grupo ang DPWH bangud sa “project splitting” ukon pag-pahat pahat sang dako nga proyekto sa magagmay nga parte agud malikawan ang mas striktu nga environmental requirements.
Luyag sang Amlig Antique Alliance amo ang masunod;
* Untaton ang road construction tubtob nga may yara na sang proper studies kag safeguards.
* Public consultations sa mga local communities, eksperto kag indigenous groups.
* Pagbutang sang pondo sa mas safe kag mas mapinuslanon nga proyekto kaangay sang like lowland road improvements, flood control, kag eco-tourism kag;
* full investigation sa mga bayolasyon sa environmental laws.
Nagpaandam ang grupo nga ang pagduso sang mga proyekto nga wala sang insakto nga pag-review ang makabig nga delikado indi lang sa mga tawo sa Antique kundi mangin sa bwas damlag sang palibot sang isla sang Panay.
