ROXAS CITY – Nagapabilin sa karon sa Hortus Botanicus, ang isolation facility sang Roxas City government sa Barangay Milibili ang isa ka Locally-Stranded Individual nga taga-Barangay Libas nga nag-positibo sa coronavirus disease (COVID-19).
Ini ang ginpahayag ni Punong Barangay Richard Arrojado sang mainterview sang Bombo Radyo.
Ang pagpaathag sang punong barangay ang may katuyuan nga madula ang pagkahangawa sang mga pumuluyo bangud wala naka-isolate sa ila barangay ang amo nga persona.
Una ini nga nag-home quarantine sa ila balay kag sang ini ang nagpositibo sa amo nga sakit, gindala ini sa isolation facility sang siyudad.
Mahibaluan nga ang nasambit nga LSI ang naga-edad sang 42 anyos nga babaye.
May yara ini sang travel history sa Pasig City kag nakapauli sa siyudad sadtong Hulyo 30 sakay sa Kabalaka sweeper flight.
Ginakabig ini nga ‘asymptomatic’ patient ukon wala nakitaan sang anuman nga sintomas sang sakit.
Gindugang pa ni Arrojado nga bukas ini sa pagbaton sang mga LSI sa ila barangay sa baylo nga nagguwa na ang resulta sang real-time polymerase chain reaction (RT-PCR) test sang mga ini.
