Ginahanda na sang Land Transportation Franchising and Regulatory Board (LTFRB) sa Western Visayas ang lista sang mga kwalipikado nga transport sector beneficiaries para sa cash subsidy program sa rehiyon agud mabuligan nga mapahagan-hagan ang epekto sang pagtaas sang gatong.
Suno kay Neva Jane Alfaras, LTFRB-6 Administrative Officer V, may yara sang 8,000 tubtob 10,000 beneficiaries sa rehiyon base sa initial nga data.
Pahayag niya, may yara sang separado nga subsidy para sa cooperative operators humalin sa mga drivers.
Sa mga modern public utility jeepneys, ang operator makabaton sang P10,000 kada unit kag P1,500 para sa mga driver.
Ang operators naman sa modern utility vehicle express services ang makabaton sang P10,000 kada unit kag ang driver ang makabaton sang P5,000.
Samtang ang mga operator sang traditional public utility jeepneys ang makabaton sang P5,000 kada unit kag P1, 5000 para sa driver.
Ang operator kag driver sang traditional utility vehicle express ang makabaton sang P5,000 kada isa.
Makabaton naman sang P10,000 kada unit ang public utility buses kag P5,000 naman para sa driver.
Ang mini-bus operator may yara naman sang P9,000 para sa operator kag P5,000 para sa driver.
Samtang ang school transport services ang makabaton sang PHP5,000 para sa operator kag driver; transport network service vehicles makabaton sang PHP1,500 para sa operator; samtang P2,000 naman ang mabaton sang taxi operator kag P5,000 para sa drivers.
Ginpahayag naman ni Mr. Salvador Altura, consultant sang Land Transportation Office Region 6, nga gina-validate sang talatapan kun bala ang mga lisensya nga ginpasa sang drivers kag operators ang professional licenses bangud kun indi, dagdagan ang mga ini sang disciplinary action kag indi mangin kwalipikado para sa cash assistance.
