Ginkilala ang Metro Roxas Water District (MRWD) sang Local Water Utilities Administration (LWUA) bilang Outstanding sa Water Safety Plan sa ginhiwat nga recognition ceremony sa Tagaytay City.
Sa interview sang Bombo Radyo kay Mr. Mark Vincent Bernas, tagpamaba sang MRWD, ginpahayag sini nga nakakuha sang ika-pito nga pwesto ang MWRD sa masobra 100 ka mga local water districts sa bilog nga Pilipinas.
Suno kay Bernas, ang Water Safety Plan amo ang handbook ukon koleksyon sang mga procedures nga ginahimo sang ahensya agud masolusyunan ang mga problema nga masami nga nagakahinabo nga kun sa diin ginapahayag nga dapat padayon sa gihapon ang paghatag sang safe water supplies sa mga consumer.
Ginpangunahan ang nasambit nga kahiwatan sang World Health Organization kag Local Water Districts nga kun sa diin ang mga ini man ang nag-evaluate sa kada water districts kun sa diin ang may mas epektibo nga water safety plan.
Para kay Bernas, pinaagi sa pagtimakas kag kolaborasyon sang pamunuan sang Metro Roxas Water District sa pagpamuno ni General Manager Atty. Dante A. Arcangeles, subong man sang mga board of directors kag sang technical committee ang nangin rason sang ila nakuha nga kadalag-an.
Ginpasiguro man ni Bernas nga apisar bastante ang gina-produce nga tubig sang MRWD, wala ini sila nagapahuway magpanumdom kun paano pa mapataas ang kapasidad, kag ma-improbar ang ila distribution lines para masiguro ang water security para sa mga konsumidor sini.
