Ginhatagan pagtamod ni anay National Economic and Development Authority (NEDA) Director Cielito Habito ang kinahanglanon nga pag-angkon sang maathag nga roadmap sang gobyerno agud maipakita ang matuod nga potensyal sang mga manggad sang dagat sang Pilipinas kag mahimo nga mapasanyog ang “blue economy.”
Sa isa ka interview samtang ginapatigayon ang Philippine Blue Economy Roundtable, ginhatagan pagtamod ni Habito nga ang pag-angkon sang maathag nga roadmap ang kinahanglan agud nga mangin globally competitive ang Pilipinas kag sarang nga makigsabayan sa mga kaiping nga mga pungsod sa Southeast Asia, partikular na sa apat ka orihinal nga myembro sang ASEAN nga kadungan sang Pilipinas, ini amu ang Indonesia, Malaysia, Singapore, kag Thailand.
Suno kay Habito, bisan pa nga nasambit na ang blue economy sa Philippine Development Plan, wala pa suno ini sang konkreto nga plano agud dalayon ini nga mapuslan.
Sakop sang blue economy ang mga sektor kasubong sang pag-pangisda, turismo sa baybayon, kag pag-atipan sa manggad sang kadagatan.
Nagpahanumdum man ang anay NEDA chief nga mahimo magresulta sa sobra nga paghimulos sa dunang manggad kun wala sang estratehiya kag insakto nga pagdumalahan.
Magluwas sa naka-pending nga Blue Economy Act sa Kongreso, ginhinalaan man sa nasambit nga roundtable discussion ang pila pa sa mga hagna may kaangtanan sa blue economy.
Kalakip diri nga hagna ang kasubong pagtukod sang isa ka Center para sa West Philippine Sea Studies ka gang National WPS Day para pabaskugon pa ang presensya sa West Philippine Sea kag maatipan ang dunang manggad sa kadagatan.
Sa katapusan, nagpanawagan si Habito nga gilayon nga bululigan sang gobyerno, mga pribado nga sektor, kag local government units agud masiguro ang kadalag-an sang blue economy nga kaangay haligi sang kauswagan sang pungsod.
