ROXAS CITY – Ginbaha ang pila ka mga barangay sa syudad sang Roxas kag probinsiya sang Capiz kasunod sang pagbubo sang mabaskog nga ulan nga dala sang habagat.
Naperwisyo ang mga residente nga magapauli na kuntani sa Barangay Tiza, Roxas City bangud sa pagtaas sang lebel sang tubig sa karsada sa diin indi makaagi ang mga tricycle.
Nagtaas man ang lebel sang tubig sa mga kasubaan sa mga banwa sa Capiz bangud sa mabaskog nga ulan.
Suno kay Provincial Disaster Risk Reduction and Management Office action officer Esperedion Pelaez, nagtaas ang volume sang ulan nga nagbubo sa probinsiya rason nga nagresulta ini sa mga flashfloods sa iban nga lugar kalakip na sa Barangay Yatingan, Pontevedra kag banwa sang President Roxas, Capiz.
Nagdugay sang tatlo tobtob apat ka oras ang pagbaha sa nasambit nga mga lugar antes naghubas.
Bangud diri, gin-alerto ni Pelaez ang mga residente nga nagapuyo sa mga lugar nga ginakabig nga flood prone areas nga mag-aligmat.
