Mag-amay, naaksidente sa motorsiklo sa banwa sang Sigma

ROXAS CITY – Gasgas sa magkatuhay nga parte sang lawas ang naangkon sang 8-ka tuig nga babayi matapos nga naaksidente ang ginasakyan nga motorsiklo sa Barangay Mansacul, Sigma, Capiz.

Ang wala na ginhingadlan nga bata ang sakay sa motorsiklo nga ginamaneho sang iya 35-anyos nga amay, nga residente sang amu nga banwa.

Nahibaluan nga samtang ginasubay sang driver ang amu nga dalan, hinali ini nadulaan sang kontrol sa manubela kag natumba.

Gilayon ini nga gindapatan sang pagbulong sang mga katapo sang MDRRMO kag Sigma Response Unit kag nagpamalibad ang amay nga dal-on sila sa ospital.

Wala naman ini ginrekord sa mga kapulisan bangud aminado ang amu nga Mister nga aksidente ang natabo sa ila sa dalan.