Natumod na sang mga otoridad ang mga suspetsado nga mag-amay sa Bondi Beach shooting sa Australia nga nagpatay sang 16 ka mga tawo samtang 40 ka iban pa nga mga indibidwal ang napilasan.
Suno sa lokal nga kapulisan, napatay ang 50-anyos nga suspek nga isa ka amay matapos ginluthang sang mga kapulisan sa crime scene samtang nagapaayo na sa karon sa ospital ang iya 24-anyos nga anak.
Ang 50 anyos nga suspek ang natukiban nga isa ka lisensyado nga nagahupot sang armas luthang kag may anum ka pusil nga narehistro sa iya ngalan, nga nasapwan malapit sa Bondi Beach.
Duha man ka active improvised devices ang nakit-an sa lugar sang krimen, apang sang ulihi gindeklarar nga safe ang lugar matapos ginkakas ang mga eksplosibo sa lugar.
Pagkatapos sang insidente, 328 ka mga pulis ang gin-deploy agud maghatag sang dugang nga seguridad kag suporta sa komunidad sang mga Judiyo sa Sydney.
Sa natabo nga pagpangluthang, ginpuntariya sang mga suspek ang komunidad sang mga Judiyo nga nagasaulog sang pagsugod sang tuigan nga Hanukkah, ang walo ka adlaw nga Jewish Festival of Lights.
