Nagpasaka ang Bureau of Internal Revenue (BIR) sang sapaw-sampaw nga kaso nga paglapas sa kasuguan sa pagbayad sang buhis ukon tax evasion, batok kay Pacifico “Curlee” Discaya II, Cezarah Rowena “Sarah” Cruz Discaya, kag isa ka opisyal sang korporasyon nga nagatrabaho sa St. Gerrard Construction.
Suno sa pahayag ni BIR Commissioner Romeo Lumagui Jr., ginabanta sa ₱7.1 billion pesos ang kabug-usan nga kantidad sang ila wala mabayaran nga buwis, ukon tax liability.
Ang nasambit nga kantidad ang ginabug-usan sang pila ka sahi sang buwis nga wala pa nabayaran humalin sang tuig 2018 tubtub 2021.
Lakip diri ang income tax, excise tax nga ginapatuman sa siyam ka mga luxury vehicles, kag ang documentary stamp tax nga may kaangtanan sa gina-alegar nga pag-divest ukon pagkuha sang interes gikan sa apat ka mga construction firms.
Dugang pa nga ginbuyagyag sang BIR nga wala sila sang may nakita nga record ukon dokumento nga nagapamatuod nga nagbayad sang documentary stamp tax ang mag-asawa nga Discaya.
Bangud sini, nagapati ang BIR nga indi genuine ukon butig ang ila divestment sa nasambit nga mga kumpaniya.
Buot silingon, mahimo nga nagpakuno-kuno lang sila nga ginkuha ang ila kaugalingon sa ila interes sa mga kompanya agod malikawan ang pagbayad sang nagakaigo nga buhis.
Nagpasalig si Commissioner Lumagui sa publiko nga siguraduhon niya nga mapreso ang mag-asawa nga Discaya kag ang iban pa nga opisyal sang ila mga kompaniya.
