ROXAS CITY – Ginpanginwala karon sang mag-asawa ang akusasyon sang seruhana nga sila ang responsable sa pagkadula kag pagkamatay sang anum ka bulan nga lapsag sang mag-asawa nga Untayao sa Sityo Terel, Barangay Tanque, sining syudad.
Sa exclusive interview sang Bombo Radyo sa wala ginhingalanan nga ginang, ginpahayag sini nga wala sang balasehan ang ginapatu pato nga akusasyon batuk sa ila sang seruhana nga aswang sila nga mag-asawa kag sila ang nagtago kay Baby Xia.
Aminado ang ginang nga ila ginkatingala nga nagpadulong sa ila balay ang mag-asawa nga Untayao kag ginpamangkot kun ila nakita ang lapsag bangud ini ang nadula.
Apang wala nagsulod sa ila pinsar nga ginadudahan na sila nga mag-asawa, bangud wala sang rason para ila kuhaon ang lapsag.
Matapos diri nagpadulong sila nga mag-asawa sa Barangay Sibaguan nga kinaandan na nila nga ginahimo tagsa ka Sabado.
Nakibot lamang sang nakabaton sang impormasyon nga madamo sang tawo nga nagpadulong sa ila balay kag ginapangita ang lapsag bangud sila nga mag-asawa ang ginatudlo sang seruhana nga nagkuha sa lapsag sang mag-asawa nga Untayao.
Bangud sa natabo, luyag sang ginang nga mag-atubangay sila sang mag-asawa nga Untayao kalakip ang seruhana bangud indi lamang ang ila kabuhi ang nabutang sa peligro kundi mangin ang ila mga kabataan ang na-trauma na sa natabo
