ROXAS CITY – Bugal sang mag-asawa nga Bulquerin nga tumandok sang Roxas City, Capiz nga makapasar ang ila duha ka mga kabataan nga babayi sa 2023 Physician Licensure Exam (PLE), nga ginpaguwa sang Marso 16, sini nga tuig.
Sa interview sang Bombo Radyo ka Dra. Danielle Samantha Ong Bulquerin, 25-anyos, manghod sang isa man ka passer nga si Dra. Nicola Jessa Ong Bulquerin, suno diri nga ‘childhood dream’ sini ang pagiging isa ka doctor, kag nalipay gid ini bangud sila nga mag-utod ang makabig first generation doctors sa ila pamilya.
Nakabulig man sa ila galastuhanon sa pagtuon ang pag-angkon sini sang scholarship sa medisina sa De La Salle University.
Nangin pagpanghangkat man sa ila nga mag-utod ang COVID-19 pandemic, apang ini man ang ila nangin inspirasyon agud pakamaayuhon pa ang ila pagpanikasog nga mangin doktor.
Plano man nila sa karon nga magbalik kag magserbisyo sa probinsya.
Mensahe ni Bulquerin sa mga nagalab-ot sang ila handum nga indi mag-untat sa pagpakigbato para diri bangud igahatag man ini sa tawo nga nagatimakas, kag sa mga naga-aspirar nga mangin isa ka doktor, normal ang mga pagtilaw sa pag-abot sang inyo handum, apang kun mag-abot ang tion nga maluyahan, kinahanglan nga panumdumon nila kun para sa diin ukon kay sin-o ang ila pagtimakas nga mangin doktor.
