ROXAS CITY -Patay ang mag-utod matapos nga nalumos samtang nagapaligo sa suba sa Sitio Balud, Barangay Matagnop, Dao, Capiz.
Ginkilala ang mga biktima nga sanday Bea 13-anyos kag ang manghod nga si Maymay walo ka tuig ang edad.
Ginpahayag ni Norma Alteza, lola sang mag-utod nga naglisensiya sa iya ang mga apo nga magapadulong sa suba para magpaligo kag magpangkuha sang agihis.
Apang lipod sa ihibalo sang lola nga indi lamang ang iya duha ka mga apo ang nagpaligo sa suba kundi kalakip ang duha pa nila ka mga utod kag duha ka mga pakaisa.
Posible nga wala sang ihibalo ang mga biktima nga madalum na nga porsyon sang suba ang ila ginpaliguan.
Ginkakibot na lamang sini sang gintundaan sang duha pa ka mga apo nga nalumos ang mga biktima.
Nahibaluan nga nagdugay sang duha tobtob tatlo ka oras antes nakita ang bangkay sang mag-utod.
Suno diri nga indi kahibalo maglangoy ang mga apo kag posible nga nahulog sa buho ang mag-utod antes nalumos.
Samtang ginpahayag naman sang isa pa gid ka lola sang mga biktima nga naglisensya man sa iya ang mga apo nga mapadulong sa suba.
Ginsaway kag ginpaandaman pa sini ang mga apo nga indi magpadulong sa suba bangud Biyernes nga adlaw kag santu sa mga katigulangan nga mariit.
