ROXAS CITY – 1 patay 1 pilason sa pagbun-anay kag pagtiruhay sang magbayaw sa Barangay Culajao, Roxas City.
Nag-angkon sang patal nga sugat sa dughan ang biktima nga si Rolando Cordovero matapos ginbuno sang bayaw nga si Ruperto Trinidad nga napilasan sa tiyan nga naglapos sa likod matapos tiruhon sang biktima.
Nag-ugat ang krimen matapos gin-akusahan sang biktima ang suspek nga nagapangawat sa nadula nga mga kagamitan sa ila nga balay.
Bangud diri, ginsabat ni Trinidad ang mga akusasyon ni Cordovero nga ginkaakig sang biktima gani hinali sini nga ginkuha ang 9mm pistol kasunod ang pagtiro sa suspek.
Sa pihak nga nakadalagan na ang biktima nalagas pa ini sang suspek nga nakasunod sa iya kasunod ang pagbuno sa dughan.
Gindala pa sa ospital si Cordovero apang gindeklara nga dead on arrival samtang ginpaidalum naman sa hospital arrest ang suspek, bangud sa naangkon nga pilas sa tiyan.
