ROXAS CITY – Nagapabilin sa karun nga ginabulong sa ospital ang magulang, matapos nga ginlabo sang iya kaugalingon nga manghud sa Barangay Dacuton, Dumarao, Capiz.
Mahibaluan nga ginkilala ang biktima kay Aljer Clarin 32-anyos samtang ang suspek ang ginkilala naman kay Jemuel Clarin, 30-anyos kag lunsay mga residente sang nasambit nga barangay.
Sa impormasyon nga nakuha sang Bombo Radyo nagikan sa Dumarao MPS, ginaalegar nga nagpadulong ang biktima sa puluy-an sang suspek nga yara sa impluwensya sang makahulubog nga ilimnon kag nagmaoy.
Dugang pa diri, ginapahayag nga ginwasak sang biktima ang pirtahan sang puluy-an sang suspek rason nga nagkuha ini sang binangon kag ginlabo ang biktima.
Bangud sini, nag-angkon sang pilas sa ulo kag abaga ang biktima.
Gilayon naman nga nadakpan ang suspek sang mga nagresponde nga kapulisan kag sa karun yara na ini sa kustodiya sang Dumarao MPS para sa nagakaigo nga disposisyon.
