Nagatukod na sang impeachment complaint ang Makabayan Bloc batuk kay Vice President Sara Duterte.
Suno kay Makabayan Coalition Vice Pres. Teddy Casiño, ang mga isyu nga ginapangatubang ni VP Sara ang seryoso kag indi simple nga krimen, kasubong sang indi maathag nga paggastos sini sang confidential kag intelligence fund, pagtangka sang OVP nga takpan ang anumalya sa paggastos sang nasambit nga pondo, mga kontrobersyal nga statement ni VP Sara natuhoy sa pagpamahog sini nga pagpatay kanday PBBM, First Lady Liza Marcos, kag House Speaker Ferdinand Martin Romualdez.
Ang mga nasambit nga isyu suno diri ang pwede nga makabig bilang ground para sa graft and corruption, betrayal of public trust kag ‘other high crimes’, tatlo ka basehan para sa impeachment complaint, base sa probisyon sang saligang batas.
Nagapaidalom na sa karon sa assessment sang legal team sang Makabayan ang tanan nga ebidensiya agud makabuo sang solidong kaso para sa tayuyon nga pagsipa kay VP Sara sa pwesto.
Suno pa kay Casino, sala nga ikabig ang tanan nga isyu nga ginapangatubang ni VP Sara bilang simple nga political issue apang seryoso nga banta ang mga ini sa gobyerno kag sa bilog nga pungsod.
Sa karon, wala pa sang nakaistorya ang Makabayan nga sarang mag-sponsor sa gina-file nga complaint.
Samtang, ginkasubo naman sang grupo ang una nga pahayag ni Ombudsman Samuel Martires nga wala pa sang rason agud kasuhan si Vice President Sara Duterte.
Suno kay Casino, masyado nga maaga ang ginpaguwa nga statement ni Martires. Mas maayo suno diri nga hulaton danay sang Ombudsman ang resulta sang pagdinig sang Committee on Good Government and Public Accountability bag-o maghatag sang anuman nga komento.
Makasulubo man suno diri nga kasubong ang pahayag sang dapat kun tani nga ‘Number one guardian’ sa usapin sang graft and corruption.
