Ginpaguha na sang Malakanyang ang veto message ni Presidente Ferdinand R. Marcos Jr kun sa diin ginapakita diri ang appropriations sa panukala sang pampungsudnon nga budget nga gin-veto.
Nakapaloob sa general comments sang veto message sang Presidente nga kinahanglan nga masiguro nga mapatuman ang fiscal discipline sa tunga sang target nga makuha ang Agenda for Prosperity.
Sa parte sang direct veto sang Presidente, ginatumod diri ang pila ka items of appropriation nga indi suno consistent sa program activities sang gobyerno ukon indi naayon sa 8 point agenda sang Marcos administration.
Kalakip diri ang masobra P26 billion pesos nga programa kag Proyekto sang DPWH amo man ang unprogrammed appropriations nga yara sa masobra P168 bilyon Piso.
Buot silingon, madula ukon deleted na ang nasambit nga balor sa DPWH rason agud magnubo man ang budget sang ahensiya.
Ginpaidalom naman sa conditional implementation ang pila ka programa nga may kinaangtanan sa paghatagay sang ayuda kasubong sang AKAP program ukon ang Ayuda sa Kapos ang Kita.
Ang implementasyon sang programa ang pagahimuon pinaagi sang polisiya kag guidelines nga balangkason sang DSWD , NEDA kag DOLE.
Matandaan, ginpermahan na kahapon nga adlaw sang Lunes ni Presidente Ferdinand Marcos Jr ang 2025 national budget.
Gin-athag naman ni Pangandaman nga ang na veto nga P194 billion amo ang mga progmara nga indi kalakip sa prayoridad sang administrasyon.
