Nakadakop sang malapit 20 ka mga traffic violators ang katapo sang Traffic Management Unit kag Land Transportation Office sa bypass road malapit sa Roxas airport sa Barangay Baybay, Roxas City kaina sang aga.
Sa interview sang Bombo Radyo kay Teodoro Arce Sembrano, katapo sang Traffic Management Unit, iya ginpahayag nga ang mga nadakpan nga mga motorista ang bangud wala sang helmet nga suksok, wala sang lisensya, kag wala man sang permit.
Suno kay Sembrano, ang pagpatuman sang safety sa dalan ang ila prayoridad ilabi na sa mga kabataan nga kulang sa eksperyensya sa dalan kag ihibalo sa mga traffic rules kag signs, nga nagapasaka sang risgo sang aksidente.
Pahayag niya, ang pagpatuman sang traffic rules wala pinilian kag ginapatuman ini sa tanan nga nagalapas sa pagsulondan.
