Pilason ang isa ka mamumugon matapos ginlabo sang isa ka lalaki sa Sitio Agbabadiang, Barangay Calaan, Panitan, Capiz.
Sa impormasyon nga nakuha sang Bombo Radyo nagikan sa Panitan Municipal Police Station, ginkilala ang biktima kay alyas Rene, 46-anyos, samtang ang ginatudlo naman nga suspek ang ginkilala kay alyas Wilmie, 29-anyos nga lunsay residente sang nasambit nga lugar.
Ginapahayag nga samtang magapauli na kun tani sa ila balay ang suspek sang naagyan nya ini nga naga inom-inom ang biktima sa isa ka balay kag gintawag ini ang suspek sang biktima agud mag-intra sa ila pag inom-inom.
Pagkaligad ang pila ka minutos, may nagluntad nga mainit nga pagbinaisay sa tunga sang biktima kag suspek rason nga nagbayluhanay sang inomok ang duwa kag naagawan sang suspek ang hinganiban sang biktima kag hinali nalang nga ginlabo sang amo nga suspek ang biktima.
Bagud sini, pilas sa ulo kag likod ang naangkon sang biktima nga gilayon naman nga gin-respondehan sang Panitan MDRRMO agud mahatagan sang pauna nga pagbulong kag madasig man ini nga ginpadangat sa ospital para sa nagakaigo nga pagbulong.
Nahibaluan nga yara sa impluwenysa sang makahulubog nga ilimnon ang magtimbang nga bahin sang natabo ang insidente.
Sa karon, yara na ang suspek sa kustodiya sang Panitan MPS para sa nagakaigo nga disposisyon.
