Napasakaan na sang kaso nga homicide ang manager kag caretaker sang isa ka compound sa Barangay Dumulog, Roxas City, kasunod sang kamatayon sang isa ka 17-anyos nga senior high school student nga nakuryente sa nasambit nga lugar.
Ang biktima amo si alyas “Angel,” isa ka senior high school student kag residente sang Barangay Banica, Roxas City.
Sa interview sang Bombo Radyo kay Police Lieutenant Colonel Rogelio Tomagtang Jr., Officer-in-Charge sang Roxas Component City Police Station, iya ginpahayag nga ginpasakaan na sang kaso nga homicide ang mga suspetsado sa City Prosecutor’s Office.
Suno kay Tomagtang, tatlo ka mga testigo ang naghatag sang impormasyon nga nakabulig sa pagpasaka sang kaso batok sa mga suspetsado.
Ginpasalamatan man sang mga kapulisan ang mga barangay officials nga nagbulig sa kaso.
Matandaan nga sang Agosto 1, nasapwan ang biktima nga nagasandig ukon nagahikot sang iya buhok sa isa ka barbed wire nga konektado sa isa ka balay nga may live electrical wire, nga ginapatihan nga gintunaan sang pagkakuryente kag kamatayon sang biktima.
