Magasugod na ang Philippine Statistics Authority (PSA) sang mandatory nga census sa bilog nga populasyon sang pungsod sa masunod nga semana.
Liwat na nga magapangulekta ang mga ini sang mga datos kag impormasyon naangut sa populasyon kag para man sa Community-Based Monitoring System (CBMS) sang ahensiya.
Para sa population census, ang mga household members ang pagalistahon agud nga ma-update ang population count sa pungsod.
Suno diri, kinahanglan maghatag sang accurate ukon intsakto nga impormasyon ang mga pumuluyo.
Kinahanglan man nga magkooperar kag makigbahin ang publiko bangud kun indi, posible nga prisuhon ang mga ini kag multahan sang penalidad nga nagabalor sang P100,000.
Para naman sa CBMS, pagakolektahon ang mga nasambit nga datos nga magamit sa pag-plano kag pag-implementar sang mga proyekto sang gobyerno sa local level.
Dugang pa sini, kinahanglan man ang consent sang mga pumuluyo nga magpakigbahin diri.
Ginganyat naman ni National Statistician Dennis Mapa ang publiko nga magpakigbahin kag ihambal ang tama nga mga impormasyon nga ginapangayo sang mga enumerators.
Agud masiguro nga legit ang pagahiwaton nga census, ang mga enumerator’s ang magasuksok sang uniform nga may logo sang PSA kag may suksuk man ang mga ini nga ID.
Sa interview naman, yara lamang ini sa 45 minutos, kag magapamangkot lamang ang mga enumerators sang mga basic informations kasubong sang pangalan, edad, lugar kag trabaho sa kada puluy-an nga pagasudlan sini.
Samtang, naghatag naman ang gobyerno sang P5.2 billion nga pondo para sa 70,000 ka enumerators nga iga-deploy para magbisita sa mga puluy-an kag may kabug-usan nga 27 million households humalin Hulyo 15 tubtob Setyembre 15 tuig 2024 nga na-irekord sa pungsod.
Base sa ulihi nga census sadtong tuig 2020, nagdangat sa 109 million ang kabug-usan nga populasyon sa Pilipinas.
