PILAR, CAPIZ – Patay ang isa ka mangingisda matapos nga ginluthang sang kapareho sini nga mangingisda sa tunga sang kalalawran sa banwa sang Pilar, Capiz.
Ginkilala ang biktima nga si Rommel Francisco, 26 anyos, residente sang Barangay Natividad sang nasambit man nga banwa.
Base sa inisyal nga impormasyon nga nakuha sang Bombo Radyo gikan sa Pilar Municipal Police Station, yara sa tunga sang kalalawran ang biktima kaupod si Sonny Garcia, 50 anyos sang hinali na lamang nagpalapit sa ila ang suspek nga si Rodrigo Flores, 44 anyos sang Barangay Guinticgan, Carles, Iloilo nga sakay man sa isa ka baruto.
Sa ila kakibot, ginpaguwa sang suspek ang iya armas-luthang kag gintiro si Francisco nga naigu sa kilid sang iya nga lawas.
Gintuyo man nga tiruhon sang suspek si Garcia apang nakalumpat ini sa ila ginasakyan nga baruto.
Gindala pa sa ospital si Francisco apang gindeklarar ini nga dead on arrival.
Madasig nga nakapalagyo ang suspek matapos ang pagpangluthang kag padayon sa karon nga ginaayam sang mga kapulisan.
