ROXAS CITY – Ginakabig nga dako nga problema sang pila ka mga mangingisda sa Barangay Punta Cogon, Roxas City isa sa ginakwaan sang seafood sa syudad, ang pagpauntat sa pag-ani ukon pagbaligya sang panginhason.
Sa interview sang Bombo Radyo kay Tatay Willie, mangingisda kag supplier sang tahong kag talaba, suno sa iya nga madamo siya sang stock sang tahong apang indi niya ini mabaligya kag dako nga kapiyerdihan sa iya samtang magagmay paman ang talaba nga natalana i-harvest sa Nobyembre.
Suno sa iya nga wala siya sang mahimo kundi magsunod kag maglikaw man sa pagkaon para sa kaluwasan sang iya pamilya, gani nagamantenir nalang ini sa sardinas.
Gintul-id man ni Tatay nga malimpyo ang ila kalalawran kag wala ini may natandaan nga nagluntad ang red tide sa ila lugar sa mga nakaligad nga mga tinuig. Nagalaom man sila nga mga apektado nga mabuligan sang gobyerno bangud wala sila makuhaan sang pangitan-an.
