ROXAS CITY – Arestado ang isa ka mangunguma matapos ang gin-implementar nga search warrant sang mga katapo sang Criminal Investigation and Detection Group (CIDG) Capiz kag Maayon MPS sa Barangay Piña, Maayon, Capiz.
Ginkilala ang arestado kay Rolly Villanueva Dumolong, 52 anyos nga residente sang nasambit nga lugar.
Nakuha sa paghinakop ni Dumolong ang isa ka unit sang 12 gauge shotgun nga may yara sang steel magazine kag bala.
Ang search warrant ang ginpirmahan kag ginpapanug ni Hon. Lorencito Diaz sang RTC, 6th Judicial Region, branch 1, Roxas City, napetsahan Mayo 30, 2023.
Ginpahayag nga may mga reklamo nga nabaton ang mga kapulisan angut sa pagpamahog ni Dumolong sa pila ka pumuluyo, gamit ang amu nga armas-luthang.
Nagapangatubang ini sang kaso nga paglapas sa RA 10591 ukon Comprehensive Firearms and Ammunition Regulation Act.
Nagapabilin ini sa kustodiya sang Maayon MPS para sa nagakaigo nga disposisyon.
