Patay ang isa ka mangunguma matapos ginbuno sa Sitio Dagwil, Barangay Mangoso, banwa sang Sigma, Capiz.
Ang biktima amo si alyas nga “Jojo,”, 44-anyos kag residente man sang nasambit nga barangay.
Sa interview sang Bombo Radyo kay Police Major Narciso Sables Jr., officer in- charge sang Sigma Municipal Police Station, iya ginpahayag nga nasapwan sang iya bata nga nagahigda ang biktima kag nagalapta ang dugo sa salog bangud sang mga pilas nga iya naangkon.
Gilayon nga gindala ang biktima sa Dao District Hospital agud mabulong, apang gindeklarar nga dead on arrival sang attending physician.
Samtang, ang suspek ang boluntaryo nga nagsungka sa Punong Barangay sang lugar pagkatapos sang insidente.
Sa subong, yara na sa kustodiya sang Sigma Municipal Police Station ang suspek samtang ginahulat ang pormal nga pagsaka sang kaso batok sa iya.
