ROXAS CITY– Patay ang isa ka mangunguma matapos gintadtad sang luthang sa Barangay Damayan Sapian, Capiz.
Ginkilala ang biktima nga si Arnel Aninang, 62-anyos kag residente sang nasambit nga barangay.
Base sa imbestigasyon sang Sapian PNP, naggikan ang biktima sa ila ulumhan kaupod sang iya asawa sang matabo ang insidente.
Ginapahayag nga ginkakibot sang tiayon sang biktima sang makabati ini sang asod-asod nga lupok kadungan sang pagkatumba sang iya bana kag nagapaligo sa kaugalingon nga dugo.
Nag-angkon sang napulo ka mga pilas sa iya nga lawas ang biktima nga posible gintunaan sang iya kamatayon.
Gilayon man nga nagpalagyo ang duha ka mga suspek nga nakajacket kag naka-mask agud indi makilal-an ang ila mga hitsura sandig pa sa panaysayon sang ginang.
Pagtimalos ang ginatan-aw nga motibo sang mga suspek sa pagluthang sa biktima nga nagresulta sang iya kamatayon.
Sa karon padayon ang imbestigasyon sang mga otoridad agud mahatagan sang kasanagan ang krimen.
