MAAYON CAPIZ – Pilason ang mangunguma nga lalaki, matapos ginapahayag ginlabo sa Barangay East Villaflores, Maayon Capiz.
Sa interview sang Bombo Radyo sa hepe sang Maayon Municipal Police Station nga si PMaj. Syril Punzalan ginpahayag sini nga ginkilala ang biktima kay Randy Dilla, 36-anyos kag residente sang Barangay East Villaflores samtang ang ginatudlo suspek ang ginkilala naman kay Raul Dang Dang, 45-anyos kag residente sang Sitio Proper sa nasambit nga lugar.
Suno kay Punzalan, nga samtang naga-inum-inum ang biktima sa puluy-an sang iya gintrabahuan nga ulumhan nga si Joel Villanueva nag-abot ang suspek nga yara na sa impluwensya sang makahulubog nga ilimnon.
Sang maubos na ang ila ilimnon, naglisensya man suno diri ang suspek nga magapauli na.
Apang dako ang ila kakibot sang hinali lamang nga ginlabo sang isa ka bes sang suspek ang biktima kung sa diin naigo ini sa iya batiis.
Matapos ang pagpanglabo, madasig nga nagpalagyo ang suspek sa lugar samtang gilayon naman nga nagpangayo sang bulig si Villanueva agud matigayon nga madala sa ospital ang biktima para sa nagakaigo nga pagbulong.
Sa karun, padayon ang imbestigasyon sang katapo sang Maayon MPS angut sa insidente subong man ang hot pursuit operation batuk sa nasambit nga suspek.
