ROXAS CITY – Pilason ang isa ka 53-anyos nga mangunguma matapos ginlabo sa Sitio Terum, Brgy. Codingle, banwa sang Dumarao.
Ginkilala ang biktima nga si Badelino Ladate De Felix, residente sang nasambit nga barangay samtang ang suspek ang wala pa makilala.
Sandig sa imbestigasyon sang Dumarao Municipal Police Station, takna 9:30 kagab-i sa nasambit nga lugar, nagikan ang biktima sa isa ka birthday party kag yara sa impluwensya sang makahulubog nga ilimnon apang nagdaretso pa ini sa isa ka tiangge kag nagbakal pa sang ilimnon kag nagpauli.
Samtang nagalakat ang biktima hinali nalang ginbanggaan sang suspetsado kag ginlabo sang makaisa ka beses.
Nag-angkon sang pilas sa ulo ang biktima kag ini ang nakapangayo pa sang bulig sa mga residente nga malapit sa lugar nga gintabuan sang insidente.
Gilayon man nga nagtawag sang responde sa mga kapulisan ang iya ginpangayuan sang bulig kag madasig nga gindala sa Senator Gerardo M Roxas Memorial District Hospital sa banwa sang Dao ang biktima agud mahatagan sang nagakaigo nga pagbulong. Sa karun, padayon pa ang imbestigasyon sang Dumarao PNP sa nasambit nga insidente.
