PONTEVEDRA, CAPIZ – Pilason ang isa ka mangunguma matapos ginlabo sang nobyo sang iya bata sa banwa sang Barangay Binuntucan, Pontevedra, Capiz.
Ang biktima amo si alyas nga “toto,” 44 anyos, residente sang Barangay Yatingan, Pontevedra,samtang ang ginatudlo suspek amo si alyas “Nonoy,” menor de edad kag residente sang Barangay Binuntucan Pontevedra, Capiz.
Sa interview sang Bombo Radyo kay Police Captain Dennis Losbañes, Officer in charge sang Pontevedra Municipal Police Station, iya ginpahayag nga nagpadulong ang biktima sa puluy-an sang suspek agud bisitahon ang iya anak.
Suno kay Losbañes, may nagluntad nga pagbinaisay sa tunga sang duha tubtob nagpalapit ang biktima agud kuhaon kuntani ang sanduko, apang gintiklod ini sang suspek nga nagresulta sa pagsinakitay.
Diri na ginapahayag nga nagbalos ang suspek pinaagi sa paglabo sa biktima sang makapila ka beses.
Naka-angkon sang pilas sa nawong kag dughan ang biktima nga madasig man nga ginpadangat sa ospital.
Sa subong, yara sa kustodiya sang Pontevedra Municipal Police Station ang suspek para sa nagakaigo nga disposisyon.
INTERVIEWED BY: BOMBO ROADNIE DALANON
