Maayon, Capiz – Patay ang 43 anyos nga mangunguma matapos ginlabo kag ginbuno sang tatlo sini ka mga utod sa Barangay Maalan, Maayon, Capiz.
Ginkilala ang biktima kay Roger Voluntad, 43 anyos sang nasambit nga lugar.
Base sa imbestigasyon sang mga kapulisan nga papuli na kuntani ang biktima sakay sa iya motorsiklo kaupod ang asawa kag tatlo sini ka mga kabataan sang ginbanggaan sang tatlo sini ka mga utod.
Ginpundo sang biktima ang ginamaneho nga motorsiklo sa diin hinali na lamang ini ginlabo sang iya utod nga si Piji Voluntad, 35 anyos sang Barangay Manayupit, Maayon.
Wala pa nakuntento ang mga suspek kag ginpulihan buno sang duha ka mga utod nga sanday Fernando Voluntad, 29 anyos kag Gerald Voluntad, 25 anyos lunsay mga residente man sang nasambit nga lugar.
Bangud diri, nag-angkon sang pilas sa tangkugo kag iban nga parte sang lawas ang biktima nga gintunaan sang iya kamatayon.
Ginapatihan nga problema sa duta ang motibo sa krimen.
