Natalana nga i-revoke ang ranking sang national boxer nga si Manny Pacquiao bilang ikalima sa World Boxing Council (WBC) Welterweight fighters.
Ini matapos gin-ako sang presidente sang WBC nga si Mauricio Sulaiman nga isa ka “mistake” ang pag-assign kay Pacquiao sa mataas nga posisyon sa nasambit nga ranking.
Sa pihak sini, ginpahanugutan sang WBC si Pacquiao nga makig-away sa American boxer nga WBC welterweight champion nga si Mario Barrios sa Hulyo 19 sa MGM Grand sa Las Vegas ukon Hulyo 20, oras sa Pilipinas.
Gin-athag sang presidente sang WBC nga santo sa regulasyon sang WBC, gintugutan ang Filipino champion nga makig-away para sa amo nga titulo bangud nakabaton ini sang lisensya gikan sa boxing commission kag nakapasar sa tanan nga eksaminasyon.
Ang desisyon sang WBC nga hatagan sang mataas nga ranggo ang legendary nga PINoy boxer kag tugutan nga ipakigbato ang nasambit nga titulo sa iya pagbalik sa boksing ang nagkuha na sang kritisismo gikan sa boxing community bangud apat ka tuig na ini nga wala nakapakigbato sa professional boxing. Ang katapusan nga away sang Filipino icon amo sang 2021 kun sa diin ini ang nalutos sang Cuban boxer nga si Yordenis Ugas antes sini gin-anunsyo ang iya pagretiro sa boksing sang Setyembre 29, 2021.
