ROXAS CITY – Pilason ang duha ka mga persona matapos ang nagluntad nga aksidente sa Arnaldo Boulevard, Barangay Baybay, Roxas City.
Ginkilala ang nagtabok nga persona kay Fernando Cartujano, 62-anyos, manugbulkit kag residente sang Brgy. Cagay, Roxas City.
Samtang ang driver sang motorsiklo ang ginkilala kay Nigel Dela Peña, sa legal nga pang-edaron kag residente sang Brgy. Baybay, sini nga syudad.
Sa panaysayon ni Imelda Angeles, live-in partner sang manugbulkit, nagbakal sang soft drinks kag ‘ice’ si Cartujano sa tiyangge, apang sa iya pagtabok, ginaalegar nga nasangit ini sang nagapadulong nga motorsiklo nga madasig ang pagpadalagan.
Samtang, suno sa driver sang motorsiklo nga naalang-alangan ini sa gulpi nagtabok nga tigulang.Bangud diri, lunsay nag-angkon sang kapilasan sa tuhod kag kamot ang duha ka mga nadalahig nga persona.
Madasig nagpadulong ang mga katapo sang RCERT kag gindapatan sang pauna nga pagbulong.
