PANAY, CAPIZ- Pilas sa ulo ang naangkon sang isa ka lalaki nga manugpangisda matapos ginapahayag ginlampusan sang pusil sang isa ka Barangay Kagawad sa Barangay Lat-asan, Panay, Capiz.
Ang nasambit nga manugpangisda amo si alyas “Dondon”, 67-anyos, samtang ang nasambit nga Barangay Kagawad naman amo si alyas “Rosevelt” nga lunsay mga residente sang nasambit nga lugar.
Sa interview sang Bombo Radyo kay Police Captain Ronald Ton-ogan, Hepe sang Panay Municipal Police Station, iya ginpahayag nga base sa ila nga imbestigasyon, una ini nga nakit-an sang bata sang manugpangisda nga ginlampusan sang pusil ang iya amay ni Barangay Kagawad Rosevelt kag gintayaan pa sang amo nga armas-luthang.
Dugang pa sini, bangud sa nakita ini sang bata, madasig ini nga nagkuha sang kahoy kag ginhaboy kay Kagawad rason nga ini ang naigo sa nawong kag ginaalegar nga nalipong.
Tungod kay nalipong na si Kagawad, gingapos nila ini antes sila nga nagtawag sang bulig sa mga kapulisan. Samtang, ginpadangat naman sa ospital ang amo nga manugpangisda bangud sa naangkon nga pilas sa ulo, kag ginrespondehan naman sang iya nga pamilya si Kagawad kag gindala sa ila balay.
Narekober naman ang isa ka caliber .45 pistol nga loaded sang lima ka bala nga yara na karon sa kustodiya sang Panay Municipal Police Station.
Samtang ginahulat nalang man sang mga otoridad ang desisyon sang biktima kun mapasaka ini sang kaso batok sa nasambit nga kagawad.
Reported by Bombo Sunnie Mae Batencila
