Gin-aapoint sang Miss Universe Organization (MUO) si Mario Búcaro bilang bag-o nga Chief Executive Officer (CEO) sang prestihiyoso nga international pageant organization, kasunod sang pag-organisar liwat sang Board of Directors sang JKN Global Group sa Thailand.
Si Búcaro ang magabulos kay Anne Jakrajutatip, nga pormal nga naghalin sa pwesto sang Hunyo 20, 2025, agud maghatag sang tion sa iya pamilya.
Gindayaw man sang Miss Universe Organization si Anne sa iya makahulugan nga pagpanguna nga nagpasangkad sang pangkalibutanon nga presensya sang organisasyon kag nagpabakod sang adbokasiya inclusion kag diversity.
Bilang bag-o nga CEO, tinutuyo ni Mario nga mapasangkad ang presensya sang MUO sa masobra 130 ka mga pungsod kag mapabakod ang mga programa para sa paghatag gahum, edukasyon, kag paghiliusa sang mga kababainhan. Magatutok man siya sa pagpauswag sang eksperyensya sang kandidata kag pagpabakod sang integridad sang kompetisyon.
Ang MUO Board naghatag sang bug-os nga pagsalig sa liderato ni Mario, nga ginalauman nga magadala sang bag-o nga kapagsik kag direksyon sa organisasyon. Sa idalom sang iya pagpanguna, ang MUO nagatinguha nga padayon nga mapasanyog ang authenticity, transformation, kag empowerment sa pangkalibutanon nga entablado.
